Julgamentu 11 Fevereiru

Testemuña Sira Deklara La Haree Se Mak Tiru PR Horta
DILI – Julgamentu kazu 11 Fevereiru 2008 iha Tribunal Distrital Dili, Segunda (10/08/2009), rona deklarasaun husi testemuña sira inklui familia Prezidente Ramos Horta nian hanesan Rosa Maria Carrascalão, Dulce Maria Horta, sira ne’ebe servisu iha rezidensia PR Horta nian nomos sira ne’ebe hela besik rezidensia.

Husi deklarasaun testemuña sira ne’e hatete katak, sira rona deit kilat tarutu maibe la-heree se-mak tiru Prezidente Ramos Horta.

Testemuña Rosa Maria Ramos Horta Carrascalão haktuir ba tribunal kona-ba kondisaun Prezidente Ramos Horta nian momentu hetan tratamentu iha Heliport. Rosa Carrascalão koalia ho mata-been bainhira presta deklarasaun iha tribunal.

“Bainhira hau too iha Heliport, hau sente loron ne’e hanesan infernu ba ami familia, “ katak Horta nia alin ne’e ho mata-been, bainhira hatan pergunta husi prokurador Felismino Cardoso.

Hafoin simu telefone husi kolega Maria Antonia ne’ebe hela iha area Metiaut, testemuña hateten telefone kedas ba Xefi Gabinete PR Natalia Carrascalão no Brigadeiru F-FDTL Taur Matan Ruak.

Testemuña simu resposta dehan, rona ona akontesementu iha residensia PR Metiaut, no atu ba hare besik akontesementu ne’e.

“Hau mos simu telefone husi subriña Ligia Horta dehan tiu Ze (Horta) hetan kanek,” deklara testemuña ba tribunal.

Iha loron 11 Fevereiru 2008, testemuña laiha fatin akontesimentu maibe iha nia hela fatin Pantai Kelapa hodi telefone ba-mai husu ajuda. Bainhira to’o iha Heliport, PR hetan ona asistensia mediku. Testemuña deklara akompaña PR Horta to’o ospital Darwin – Australia.

Testemuña Dulce Maria dos Reis Horta Lemos nudar subriña PR Horta nian deklara ba tribunal katak, loron 11 Fevereiru 2008 bainhira husi uma atu ba rezidensia Metiaut iha dalan klaran hasoru viziñu PR Horta naran Celestino hateten ba testemuña katak PR Horta hetan tiru. Iha momentu ne’eba, testemuña deklara hasoru Paulo Remedios ne’ebe sai husi nia uma.

Testemuña mos hatutan katak, hafoin tuun husi nia kareta, testemuña lao ain hodi hare besik saida mak akontese iha residensia PR Horta. To’o iha fatin ne’ebe PR hetan tiru, sasin haktuir nia hare PR nia alin Arsenio Ramos Horta, forsa F-FDTL Isaac ne’ebe taka metin hela PR Horta nia kanek no mos membru F-FDTL seluk ne’ebe testemuña la hatene naran.

Dulce Horta Lemos mos haktuir, momentu ne’eba ambulansia bosan ida, laiha infermeiru ruma, sofer deit mak tula prezidente ba Heliport.

Testemuña Luis Neto ne’ebe hela iha Areia Branca (rai-henek mutin) hateten, momentu halai ho nia kaben ba iha Cristo Rei konsege haree no kumprimenta PR Horta ne’ebe halai (olah raga) ho eskoltu nain rua.

Hafoin fila ba uma, rona kilat tiru razadas maibe la haree se mak tiru. Luis Neto haktuir katak iha momentu ne’e forsa ida halai ba testemuña hodi husu ajudu telefone dehan: ‘ajuda lai, Alfredo ho nia grupu asalta rezidensia prezidente republika’.

Testemuña Luis Neto mos fo telemovel ba forsa ne’e hodi komunika ba nia komandante, maibe sasin deklara la-rona diak saida mak forsa ne’e koalia iha telefone.

Testemuña Domingos Kolo no Angelo Kelo ne’ebe loroloron rega aifunan iha jardin rezidensia PR deklara ba tribunal katak, momentu akontesimentu rona deit mak kilat tarutu maibe la-hare se-mak tiru.

Testemuña sira mos deklara katak, la-konsege hare ba liur tanba tauk. Depois situasaun normal, hare deit husi dook, ema nain rua nia isin mate latan hela ba rai.

Nuneé mos testemuña Rodolfo de Assis ne’ebe hela iha area Metiaut deklara mos ba tribunal katak, rona deit kilat tarutu ho razadas maibe la-hatene se-mak tiru.

Testemuña ne’e mos haktuir, kolega ho PR Horta desde joven. Kuandu PR halo tinan, testemuña sempre asiste.

Lidio Amado, testemuña ikus ne’ebe ministeriu publiku aprezenta iha sesaun loron-kraik deklara mos ba tribunal dehan katak, bainhira hader, la-kleur rona kilat tarutu ho razadas maibe la-hatene no la-hare se-mak tiru momentu ne’eba iha residensia PR.

Amado mos haktuir, konsege hare ema nain tolu halai sae ba foho leten parte Kamea nian, maibe la-hatene lo-loos ema nain tolu ne’e tanba distansia dook.

Entertatu testemuña Arsenio Horta no Jorge Manuel Antunes mak tribunal la-konsege notifika tanba agora dadaun iha rai liur.

Julgamentu ba kazu atentadu 11 Fevereiru 2008 hasoru PR Horta no Primeiru Ministru Xanana Gusmão adia ba fulan oin mai Setembru, relasiona feriadu ba judisiario sira.

Julgamentu ne’e, partisipa husi argidu nain 23, inklui sira nain lima ne’ebe hetan termus residensia. Julgamentu ba kazu ne’e hetan seguransa maximu husi Guarda Nacional Republicana, Unidade Intervensaun Rapida, Guarda Prisioneiru sira, no mos seguransa sivil sira ne’ebe lor-loron fo seguransa iha tribunal. (Timor Post)