Julgamentu 11 Fevereiru

Enkontru Alfredo ho PR Horta,
Dalaruma Taka Ba Publiku
DILI – Izolino da Costa nudar eskoltu Prezidente da Republika Jose Ramos Horta, hanesan testamunha ba kazu atentadu 11 Fevereiru 2008 deklara ba Tribunal Distrital de Dili, segunda (03/08/2009) katak, nudar seguransa la-besik ba enkontru ne’ebe PR Horta halo ho matebian Maijor Alfredo Reinado Alves.

“Kuandu Prezidente hasoru malu ho matebian, ami seguransa la-besik, dala-ruma enkontru tertutup (taka-red), sira nain rua deit mak koalia ba malu, tanba ne’e hau la-hatene saida mak sira nain rua koalia, “ katak sasin ne’ebe hanesan mos komandante ekipa Corpu Seguransa Pesoal ba Prezidente Horta.

Tuir sasin ne’e katak, dala-ruma nia hare Prezidente Horta ho matebian Alfredo kontente no dala-ruma han hamutuk. Sira nain rua iha relasaun diak hela, “ dehan Izolino da Costa.

Testemunha haktuir, nia akompanhe PR Horta halo ona enkontru ho matebian Alfredo mak iha Pousada Maubessi no iha Ermera.

Izolino da Costa haktuir, rona akontesementu husi eis Assesor Sosiedade Sivil ba Primeiru Ministru Joaquim Fonseca, liu husi telefone.

“Senhor Juaquim Fonseca mak telefone hau hodi husu saida mak akontese iha residensia Prezidente, hau hatan dehan la-hatene tanba hau sei iha uma, “ dehan nia ba tribunal.

Depois rona informasaun ne’e, testamunha ba kedas residensia Prezidente da Republika no la-konsege hare PR Horta tanba ambulancia lori sai ona PR husi fatin akontesementu.

Testamunha seluk, komandante ekipa seguransa ba residensia PR membru forsa F-FDTL husi Polisia Militar Olderico de Araujo hateten, momentu akontesementu nia iha kampaun Metinaro hodi halao orden treinamentu no responsabilidade entrega ba adjunto Albino Assis.

Nia mos deklara katak, hanesan membru husi komandante Maijor Alfredo momentu ne’eba haktuir, matebian halao servisu ho diak.

“Hau nunka rona konaba planu Maijor Alfredo halo ataka. Maijor halo servisu diak tanba ejiji ami halo servisu tuir ordem militar nian, “ katak nia, hodi hatan perguntas husi advogado.

Hanesan komandante ekipa, nia haktuir katak, antes akontesementu la-simu informasaun ruma husi ema balun konaba vizita ruma iha loron 11 Fevereiru 2008 ba residensia PR.

Testamunha Tadeo Gabriel Pereira,15 deklara, bainhira rona lian barullu hodi karega kilat dehan labele book-an, nia halai kedas ba tenda Francisco Marcal no Albino Assis hodi hafanun membru F-FDTL nain rua ne’e iha sira nian toba fatin.

“Hau fanu sira hodi dehan maun Sico no maun Assis Maijor Alfredo tama, “ haktuir nia ba tribunal.

Testamunha Tadeu ne’ebe membru forsa F-FDTL sira konhese ho naran Tedy ne’e haktuir mos katak, momentu akontesementu nia hare Maijor Alfredo no konhese didiak matebian Alfredo tanba hare liu husi jornais no televisaun.

Depois fanu membru F-FDTL nain rua ne’e, nia halai fila ba nia tenda no iha momentu ne’eba rona kilat razadas maibe la-hatene se-mak tiru.

Tedy hanesan refujiadus iha residensia PR desde 2006 ne’e hatutan dehan, hare matebian Alfredo kaer kilat hatais farda forsa nian, hodi kesi hena iha ulun.

Testamunha ne’e haktuir, konsege hare Sico kaer metra no Assis prepara-an hela hodi sai husi tenda laran.

Nia hatutan katak, konhese metra liu husi istoria ne’ebe ema konta katak, metra ne’e kilat musan barak.

Testamunha Amelia Paixão da Silva nudar servidor iha residensia PR haktuir, iha loron 11 Fevereiru 2008 husi uma Taibessi ba residensia Metiaut ho situasaun normal.

Depois prepara PR nia aimoruk iha sala han fatin, nia haktuir konsege hare ema nain walu hatais farda maibe hanoin forsa Nova Zelandia ou Australiano sira halo exersicio.

Testamunha hatutan, konsege hetan ameasa husi maijor Alfredo ho koalia lian Tetun haruka sasin toba taka rabat ba rai nomos husu ba sasin konaba PR nia kuartu.

Tanba tauk, testamunha lakon kedas sentidu momentu ne’eba too situasaun lao normal, iha situasaun ne’e, sasin deklara, konsege hare odamatan haris fatin hetan estragus.

Testamunha iha sesaun loron-kraik ne’ebe foo deklarasaun mak Warnasooriya Patabandige Dayaratne nudar membru Polisia Nasoens Unidas iha Timor Leste husi Pakistaun.

Iha tribunal, sasin haktuir momentu halo patrulhamentu husi Becora no rona akontesementu iha residensia PR la-lori kilat maibe lori deit pistola. Bainhira too iha residensia PR situasaun lao normal ona.

Testamunha Christopher Charles Durman hanesan Manajer Jeral Banku ANZ haktuir katak, momentu rona kilat tarutu maibe la-hare se-mak tiru, konsege husu ba PR atu labele fila ba residensia maibe PR hatan dehan laiha buat ida.

Antes akontesementu, sasin sempre halai ho bisikleta iha dader no dala-ruma iha loron-kraik ba Cristo Rey.

Depois fila husi Metiaut ba uma, testamunha konfesa katak, telefone ba ANZ iha Australia dehan Timor hasoru problema, ema ataka residensia PR.

Julgamentu ba dala sia, kazu atentadu hasoru PR no Primeiru Ministru iha loron 11 Fevereiru 2008 hetan prejensa husi arguido nain 23 ne’ebe durante ne’e hela iha komarka Bekora no arguido nain lima seluk ne’ebe hetan termus de residensia.

Tanba la-konsege haruka notifikasaun ba testamunha sira hodi presta deklarasaun iha tribunal, tersa no kuarta semana ne’e, tribunal sei la-halao audensia tuir agenda ne’ebe determina ona.

Liu husi diskusaun, prokurador Felismino Cardoso husu ba tribunal atu hare fila fali lista testamunha ne’ebe simu ona. Maibe, Defensor Publik Manuel Sarmentu husu ba tribunal atu oinsa bolu uluk ema estranjeiru ne’ebe naran iha ona lista, relasiona ho tempu kontratu iha TL.

Tuir sugestaun defensor Andre Fernandes katak, tribunal bele hare testamunha Timor-oan bazeia ba lista ne’ebe tribunal simu.

Julgamentu ne'e kontinua hetan seguransa masimu husi membru Guarda Nasional Republika, Polisia Nasional TL husi Unidade Intervensaun Rapida, Guarda Prisionario nomos seguransa sivil ne’ebe bai-bain halao knaar iha TDD. (Timor Post)