Pro Kontra AMP No Fretilin

“Teatru” Politika Iha PN
■Fretilin Sei Renunsia Husi PN
DILI – Asaun politika ne’ebe reprejentante povo hatudu iha uma fukun Parlamentu Nasional durante diskusaun lei inkeritu parlamentar horisehik hanesan fali “teatru” politika ida.

Asaun nebe mosu maka hanesan Fretilin abandona plenaria, no sorin seluk, bainhira Fretilin halo deklarasaun politika deputadu husi bloku Aliansa Maioritaria Parlamentar abandona mos plenaria.

Reasaun ne’ebe deputadu AMP no Fretilin hatudu, tuir Prezidente PN Fernando Lasama de Araujo katak, “ladun diak tanba afeita ba servisu PN.

“Mais ida ne’e vida politika ne’ebe iha rai hot-hotu akontese, ida ne’e vida demokratiku. Husu ba deputadu sira hot-hotu hanoin ho responsabilidade para kumpri sira nian knaar iha parlamentu. Ba opozisaun atu labele walk out (abandona plenaria) deit, maibe hanoin tuir dalan demokratiku katak iha mundu ne’ebe deit maioria deside, minoria submete, “ katak Prezidente PN Lasama ba jornalista sira.

Prezidente ba orgaun soberanu hanesan PN husu ba povo, 2012 tempu eleisaun atu hili deputadu ne’ebe iha responsabilidade, no ida ne’ebe mak hakarak duni servisu ho laran tomak nomos responsabilidade boot ba nasaun, laos ba partidu deit.

Prezidente Partidu Unidade Nasional Fernanda Mesquita Borges hateten, asaun ne’e hanesan taktika Fretilin no AMP atu hasoru malu, maibe bele afeita ba prosesu parlamentar.

Nia informa ba povo iha Timor laran tomak katak, situasaun iha Parlamentu Nasional lao ladun diak. Povo presiza hili deputadu sira ne’ebe iha responsabilidade.

Borges hatutan, kuandu opozisaun foti povo nia problema. Tenki simu, hakarak ka lakohi povo mak simu todan ne’e. Tamba ne’e, husu ba povo katak atu hanoin didiak hodi hili iha eleisaun 2012, “ nia reafirma.

Portavoz deputadu AMP Fernando Gusmão iha intervista ba jornalista sira hateten katak, asaun walk out ne’e direitu demokratiku tamba ne’e laiha ema ida mak atu bandu.

“Buat ida ne’e mosu tamba sentimentu kolega AMP sira ladun kontente ho situasaun parlamentu nian. Parlamentu ne’e orgaun koletivu, tantu AMP no Fretilin hamutuk mak dehan parlamentu nasional, “ dehan nia.

Nia esplika funsaun PN mak halo lei, fiskalizasaun no desizaun politika. Deklarasaun politika hanesan informasaun, maibe importante mak halo lei ba nasaun. Importante seluk mak fiskalizasaun politika, governu halo servisu loos ou lae.

Xefi bankada PSD ne’e mos konfesa, asaun ne’e hanesan protesta politika ho razaun wainhira diskute konaba lei inkeritu parlamentar deputadu Fretilin abandona plenaria.

Fernando Gusmão hatutan tan katak, asaun ne’e hanesan taktika politika oinsa destabiliza funsionamentu parlamentu, para iha razaun Presidente da Republika bele desolve PN, nune’e mosu eleisaun antisipada.

Pedro da Costa deputadu husi bankada CNRT hateten, ambiente hanesan ne’e iha nasaun ne’ebe deit akontese.

“Buat ne’ebe tenki toma konsiderasaun mak rejimentu PN tenki hadia tamba funsionamentu quorum la-presiza 51 pursentu mais um, maibe funsiona um terso ne’ebe presiza regula. Maibe iha votasaun tenki iha quorum, “ katak nia.

Jacob Xavier deputadu AD haktuir, parlamentu sempre iha opozisaun ne’ebe halo deklarasaun politika. Pro no kontra buat ida normal, atu oinsa governu bele hadia povo nia moris.

Entretantu, ba jornalista sira, Xefe bankada Fretilin Aniceto Guterres hateten bankada opozisaun Fretilin iha PN sei kaer metin hahalok walk out nebe halo husi AMP, hodi renunsia husi uma fukun parlamentu.

“Hau hanoin ida ne’e hanesan rajaun fundamental ida ba ami atu kaer metin hodi renunsia husi mandatu, nudar deputadu iha parlamento nasional,”dehan Aniceto, ba jornalista.

Nia hateten hahalok walk out nebe maka halo husi AMP ne’e hanesan anti demokrasia iha plenaria laran hodi lakohi rona deklarasaun politika husi opozisaun.
Nia hateten tuir lolos ne’e, nudar partidu maioria nebe kaer ukun tenki simu kritika sira nebe maka mai husi opozisaun. (Timor Post)